Zbardhet formacioni me të cilin do të luajë ekipi Vllaznia U19 në ndeshjen ndaj kazakistanasve të Astanës, ndeshje kjo e vlefshme për “Uefa Youth League”. Trajneri Zmijani ashtu siç e kishte konfirmuar edhe vetë dje, do të ketë dy mungesa të rëndësishme për takimin e sotëm teksa do t’i mungojnë dy prej titullarëve të mbrojtjes dhe mesfushës.
Kështu, Elmir Lekaj që u pat ndëshkuar me karton të kuq në takimin e parë, nuk do mundet të luajë sot dhe po ashtu edhe mesfushori Uheid Hoxha, nuk ka arritur ta lërë plotësisht pas dëmtimin që ka patur.
Megjithatë atë pritet ta zëvendësojnë denjësisht futbollistë të tjerë. Kështu, në portë do të jetë Qarri ndërsa në
mbrojtje do të luajnë Rahova, Shimaj, Repaj e Smajli.
Në mesfushë ndërkohë do jenë Mehja e Ndreca në qendër ndërsa në krahë do të luajnë Lisaj e Asllani. Në majë të sulmit do të jetë Palushani që do të ketë mbështetjen e Qardakut nga pas.
Vllaznia U19 do të tentojë të përmbysë rezultatin 3-1 të ndeshjes së parë të luajtur në Kazakistan dhe të fituar nga vendasit. Takimi në mes këtyre dy skuadrave do të nisë në orën 17.00 në stadiumin “Loro Boriçi”.
