Mbrëmjen e djeshme Vllaznia U19 ka zhgënjyer me paraqitjen e saj ndaj kazakistanasve të Astanës duke humbur me rezultatin e thellë 0-4 në ndeshjen e kthimit të “Uefa Youth League”.
Një rezultat ky që ka mërzitur pjestarët e këtij ekipit dhe veçanërisht stafin teknik që kishte menduar tjetër paraqitje në këtë sfidë.
Jo më kot trajneri Zmijani në prononcimin e tij të pasndeshjes vlerësoi vetëm një futbollist që sipas tij u përpoq të jepte maksimumin ndërsa 10 të tjerët bënin sehir në fushën e lojës.
Po kush është lojtari që u paraqit më mirë nga gjithë të tjerët në kampin shkodran? Burime pranë skuadrës bëjnë të ditur se futbollisti që dha gjithçka nga vetja e tij dhe nuk rreshti për asnjë moment së luajturi për të ndihmuar Vllazninë, ka qenë mbrojtësi Egzon Shimaj.
I saktë në ndërhyrjet e tij, i shpejtë dhe protagonist jo vetëm në mbrojtje por edhe në mesfushë në tentativë për të ndihmuar ekipin. Të mos harrojmë se Shimaj është i datëlindjes 2001, pra vetëm 17 vjeç.
Më i riu nga të gjithë pjestarët e ekipit të të rinjve të Vllaznisë. Por dje ka rezultuar të jetë më i mirë. Megjithatë, fotoja e këtij shkrimi e tregon qartë se edhe vetë lojtari nuk ka dashur ta shijojë aspak këtë “sukses personal”.
Ai ka lënë fushën e “Loro Boriçit” me kokën ulur. Çka tregon më së miri personalitetin e tij. Jo më kot, trajneri Zmijani pas zëvendësimit të kapitenit Smajli, ia ka besuar shiritin lojtarit me numrin 22.
Të dhënat e këtij futbollisti duken shumë të mira dhe Vllaznia U19 vërtetë humbi dje, por ka fituar një futbollist: Egzon Shimën.
© shkodrasport.com
