Kampionati i Superiores U-21 ka zhvilluar ditën e sotme ndeshjet e rradhës, teksa Bylisi ka mposhtur Vllazninë. Kështu, pas një serie fitoresh të njëpasnjëshme, ekipi shkodran është frenuar sot me një humbje të thellë në transfertë, duke u mundur me rezultatin 5-1.
Pjesa e parë është mbyllur pa gola, me rezultatin e barabartë 0-0. Ndërkohë, në fraksionin e dytë, Musaraj shënoi fillimisht për kuqeblutë. Megjithatë, vendasit të gjendur në disavantazhin e këtij goli, bënë të gjitha përpjekjet për të barazuar rezultatin dhe ia arritën qëllimit, madje duke kaluar edhe në avantazh me shifrat 2-1 me anë të futbollistëve të ekipit të parë, Atshimene dhe Anthony.
Kjo dyshe do të shënonte edhe tre gola deri në fund të krejt ndeshjes, duke bërë që kjo përballje të mbyllet me rezultatin 5-1 për Bylisin. Në fakt, duhet thënë se ballshiotët kishin marrë jo pak, por shtatë prej futbollistëve të ekipit të parë, siç janë kapiteni Trumçi, Ruçi, Abazaj, Qardaku, Muçollari, Anthony dhe Atshimene dhe kjo ka ndikuar së tepërmi në rezultatin përfundimtar të kësaj ndeshjeje.
Megjithatë, pavarësisht kësaj, duhet thënë se ndeshja e luajtur ditën e sotme në Ballsh, ka “prezantuar” një Vllazni larg imazhit të saj të javëve të mëparshme. Tashmë, kjo humbje e sotme në transfertë bën që Vllaznia të mbetet në kuotën e 11-pikëve në kampionat. Ndërkohë, me fitoren e rregjistruar sot ndaj Vllaznisë, Bylisi shkon në kuotën e 19-pikëve, duke kryesuar renditjen e kampionatit. /Maringlen ZHIVANI/
Bylis-Vllaznia 5-1
Golat: Atshimene 59’, 80’, 90’, Anthony 71’, 90’+1 / Musaraj 46’
Bylis: Beqaj, Trumçi, Ngene, Ndreu, Kastrati, Abazaj, Hassan, Ruçi, Mishack, Mikailu, Mahran (u aktivizuan: Muçollari, Qardaku, Anthony,
Atshimene, Aminu)
Vllaznia (4-2-3-1): Shkoza, Shimaj, Pusi, Paloka, Spahija, Dulaj, Peku, Maliqi, Bizi, Pjeshka, Musaraj (u aktivizuan: Bushaj, Troshani, Aliu, Zaganjori) Tr: Elvis Plori
