Kampionati i Superiores U-21 do të zhvillojë ditën e sotme ndeshjen “Klasike të Shqipërisë” mes ekipeve të Vllaznisë dhe Tiranës. Kështu, pas ndeshjes së dy ekipeve të para dy ditë më parë, tashmë ky duel vlen për javën e nëntë të moshave U-21, teksa në fushë mund të zbresin deri në pesë futbollistë të ekipit A.
Kjo ndeshje vlen shumë për të dy ekipet, teksa konsiderohet si një nga përballjet më të rëndësishme të këtij kampionati, rezultati i së cilës pritet të jetë përcaktues për vazhdimësinë e sezonit.
Vllaznia, e cila do ta luajë në shtëpinë e saj këtë ndeshje, është e pesta në renditje për momentin dy pikë larg Tiranës së vendit të dytë, që sot ndoshta ka rastin ta frenojë për ta parakaluar atë. Kujtojmë këtu se, shkodranët vijnë pas një humbjeje të thellë javën e kaluar ndaj Bylisit U-21 me rezultatin 5-1.
Në fakt, kuptohet që edhe 21-vjeçarët kuqeblu konsiderohen pretendentë për fitimin e titullit kampion këtë sezon, teksa kanë bërë paraqitje pozitive dhe kanë marrë disa fitore me meritë në kampionat, por ecurinë e tyre ua prishi së tepërmi humbja e thellë 5-1 javën e kaluar me Bylisin.
Për t’u rikthyer tek ecuria pozitive, fillimisht skuadra e trajnerit Elvis Plori duhet të fitojë me patjetër ditën e sotme ndaj Tiranës, për të vijuar më pas drejt synimeve që shkodranët kanë. Ndeshja në fjalë Vllaznia-Tirana për U-21 do të luhet ditën e sotme në Shkodër, më konkretisht në fushën “Reshit Rusi”.
Maringlen ZHIVANI
