Kampionati i Superiores U-21 do të zhvillojë ditën e sotme në ndeshjen mes ekipeve të Bylisit dhe Vllaznisë. Dueli vlen për javën e tetë të moshave U-21, teksa në fushë mund të zbresin edhe pesë futbollistë të ekipit A.
Kjo ndeshje vlen shumë për të dy ekipet, teksa konsiderohet si një nga përballjet më të rëndësishme të këtij kampionati, rezultati i së cilës pritet të jetë përcaktues për vazhdimësinë e sezonit.
Ballshiotët janë kryesues të kampionatit, ndërsa Vllaznia, e cila do të jetë mysafire në këtë ndeshje, është e katërta në renditje për momentin, por që sot ndoshta ka rastin të frenojë Bylisin kryesues për t’u afruar me të.
Në fakt, kuptohet që edhe 21-vjeçarët kuqeblu konsiderohen pretendentë për fitimin e titullit kampion këtë sezon, teksa deri më tani kanë bërë paraqitje pozitive dhe kanë marrë disa fitore me meritë në kampionat.
Poashtu, edhe trajneri Elvis Plori është optimist për një ecuri pozitive të skuadrës deri në fund të kampionatit dhe për këtë arsye, fillimisht u duhet të mundin ditën e sotme Bylisin. Ndeshja në fjalë Bylis-Vllaznia do të luhet ditën e sotme në Ballsh.
Maringlen ZHIVANI
