Kampionati i Superligës në futboll po shkon gradualisht drejt fundit dhe kur kanë mbetur edhe pesë javë deri në fund të tij, ende nuk dihet se kush do të jetë skuadra që do të bjerë nga kategoria përveç Lushnjës.
Kjo duket se është enigma e vetme që ka mbetur pa u përcaktuar sepse Skënderbeu e ka siguruar titullin kampion e po ashtu edhe skuadrat që do të shkojnë në Europë thuajse janë konfiguruar tashmë.
Lufta më e fortë është ajo për të mos rënë nga kategoria. Tre skuadrat që janë në garë për këtë gjë, Vllaznia, Kamza dhe Teuta, përveçse mendojnë për ndeshjet e veta, padyshim që shohin edhe rezultatet e rivaleve.
Për këtë arsye, barazimi i fundit në mes Teutës dhe Kamzës në Durrës dhe fitorja e Vllaznisë ndaj Laçit, janë konsideruar rezultate pozitive.
Megjithatë kuqebluve nuk u mjafton kjo gjë. Atyre u duhen edhe disa pikë të tjera për të siguruar objektivin.
Dhe këto pikë, i duhet t’i marrë jo vetëm në Shkodër por edhe në ndeshjet jashtë.
Duke filluar madje që nga sfida e së shtunës në Vlorë ndaj Flamurtarit.
Problemi i Vllaznisë së këtij sezoni në fakt kanë qenë ndeshjet në transfertë sepse skuadra nuk ka arritur të shfaqet ashtu si duhet.
Kjo natyrisht që e ka penalizuar atë megjithatë këtë javë do të tentohet gjithçka për gjithçka sepse nuk ka kohë për të humbur.
Tashmë ka hyrë në lojë matematika dhe çdo pikë e marrë vlen shumë. Trajneri Gjoka e ka bërë të ditur këtë gjë dhe ndërkohë pritet që të ketë edhe ndryshime në formacion ndoshta, vetëm e vetëm që të merret pikë.
Një fitore ndaj Flamurtarit do të ishte një mrekulli më vete megjithatë edhe barazimi bën punë.
Kalendari i ndeshjeve të mbetura nuk është aspak i lehtë për kuqeblutë prandaj çdo ndeshje e mbetur duhet konsideruar një finale sepse nuk ka kohë për të humbur.
www.shkodrasport.com
