Nëse ka ndodhur diçka e bukur tek Vllaznia e sivjetme është padyshim kjo gjë që po shkruajmë më poshtë: rikthimi në Shkodër i tre futbollistëve të këtij qyteti që deri pak muaj më parë kanë luajtur nëpër ekipe të tjera të kampionatit shqiptar. Bëhet fjalë për Erjon Vucajn, Edon Hasanin dhe Gilman Likën. Një treshe që i ka dhënë bukur lojës së Vllaznisë në mesfushë dhe tashmë i kënaqen këtij fakti.
Mbase përsëritet sezoni 2003-2004 kur tek skuadra kuqeblu luanin sëbashku Vioresin Sinani, Edi Martini dhe Hamdi Salihi. Ai ishte “sulmi i bukur” i kuqebluve por njëkohësisht edhe i suksesshëm sepse sëbashku të tre ata shënuan në atë sezon rreth 70 gola. Tashmë ka rastisur që të bëhen sëbashku tre mesfushorë të cilët i dëshiron çdo ekip t’i ketë në rradhët e tij. Fakti që ata të tre janë shkodranë, ia shton edhe më shumë “bukurinë” kësaj tresheje. Në Fier në ndeshjen e parë të kampionatit, ata treguan se çfarë dinë të bëjnë. I pa me sytë e tij edhe Magani, trajneri- kundërshtar i kësaj jave dhe ka mbetur i befasuar nga kjo treshe. Ata duhet të marrin për dore Vllazninë dhe ta ngjisin aty ku i takon. Qarkullimi fantastik i topit nga këta tre futbollistë, ka filluar të konsiderohet si “tiki-taka” e skuadrës shkodrane. Sigurisht shumë larg asaj të Barcelonës, por mund të jetë bukuria e kampionatit shqiptar.
© shkodrasport.com
