Pak ditë më parë, Komisioni i Disiplinës në Kosovë ka dhënë një dënim kundër skuadrës së Vushtrrisë, duke e detyruar që të zhvillojë dy ndeshje pa tifozë për shkak të sjelljes së tyre. Vendimi i dhënë nga Disiplina nuk kishte asnjë polemikë nga klubi por tani ka ardhur edhe apelimi për vendimin.
Vushtrria ka kërkuar nga Federata që t’i falet dënimi për ndeshjen e së hënës kundër Ballkanit. Ata duan të kenë tifozë në stadium në mënyrë që të gjitha të ardhurat që do të vijnë nga kjo ndeshje, do të nisen në drejtim të Shqipërisë për ndihma në zonat e prekura nga tërmeti. Tashmë, pritet vetëm vendimi që do të japë Federata.
“Klubi ka dorëzuar kërkesë për falje të dënimit pranë FFK-së, që ndeshja e fundit e sezonit vjeshtor 2019 kundër KF Ballkanit, e cila zhvillohet të Hënën në ‘Ferki Aliu’ të luhet në praninë e shikueshmërisë Vushtrriase, ku të gjitha mjetet e grumbulluara prej biletave do ti dedikohen tragjedisë së ndodhur në Shqipëri!
Ne shpresojmë se do të hasim në mirëkuptim në mënyrë që Vushtrria të tregojë edhe një here zemërgjerësinë siç e treguan së fundi me organizimin e djelmoshave të Forcës”, shkruan klubi. /VipSport/
