Vllaznia është duke zhvilluar një pjesë pozitive të kampionatit, teksa vetëm katër pikë i ndajnë shkodranët nga vendi i katërt i klasifikimit.
Aktualisht, pas 21 ndeshjeve të zhvilluara ekipi i drejtuar nga Mirsad Jonuz siguron 28 pikë, me 7 fitore, 7 barazime dhe 7 humbje. Tre 7-at e Vllaznisë kanë bërë që tifozët të rikthehen në “Loro Boriçi” dhe një gjë e tillë u pa në ndeshjen e fundit kundër Tiranës.
Pavarësisht rezultatit dhe humbjes minimale, shkodranët kanë mbështetjen e tifozëve që janë edhe lojtari i 12-të. Mesjava i sheh kuqeblutë në transfertë me Flamurtarin, që në ndeshjen e parë të Kupës barazoi 2-2 në Shkodër.
Fundjava që vjen rezervon një sfidë të vështirë për Vllazninë, pasi përballë do të jenë durrsakët e Teutës në “Niko Dovana”. Drejtuesit e klubi kanë edhe një çështje pezull, me mbrojtësin Godfrej Ualesimbu që nuk është bërë i “gjallë”, paçka se ka marrë leje nga klubi.
Ugandezi ka javë që nuk duket në Shkodër, ndërsa klubi nuk ka bërë asnjë njoftim për shkëputje kontrate./newsport/
