Gjatë viteve të fundit në vendin tonë janë bërë disa stadiume, teksa një nga më modernët është ai i Shkodrës. “Loro Boriçi” u ndërtua thuajse nga fillimi dhe u shndërrua në një nga stadiumet më të mëdha dhe më modernë në vend. Megjithatë sot, katër vite pas inaugurimit, ky impiant nuk është në gjendjen që duhet të ishte një stadium, i cili ka vetëm katër vite që është ndërtuar.
Fusha ka treguar se është në gjendje shumë të vështirë dhe jo vetëm kaq. Pista e vrapimit, që është një nga të paktat në vendin tonë është e gjitha e amortizuar. Në të stërviten atletët e Shkodrës, mes të cilëve edhe Izmir Smaljaj, por pas vetëm kaq kohësh nga ndërtimi i saj, pista është në gjendje të mjeruar dhe thuajse e papraktikueshme nga sportistët profesionistë.
Në lidhje më ketë çështje në televizionin “TV1 Channel” ka folur deputeti Fidel Ylli. Ai shprehet se gjatë punimeve të stadiumit FSHF i kërkoi fonde shtesë qeverisë për ndërtimin e pistës, me këtë të fundit që akodroi 750 euro, por ato para u shpërdoruan dhe nuk u ndërtua një pistë sipas standarteve të kërkuara. Ai i drejtohet direkt presidentit të Federatës për t’i kërkuar llogari për adresën e atyre parave.
“E bëri tenderin Federata e Futbollit dhe për 5 ditë e prishi. Shkoni dhe pyeteni Armand Dukën se cila firmë ishte dhe ku shkuan lekët. Qeveria shqiptare ka paguar 750 mijë euro për atë pistë. Federata Shqiptare e Futbollit i kërkoi ndihmë qeverisë duke thënë se nuk ka lekë për pistën dhe siç e thashë, qeveria dha 750 mijë euro për ndërtimin e saj, e cila është prishur pa u inauguruar akoma.
Kush mban përgjegjësi për këtë abuzim? Ky është një turp, ku ende pa u inauguruar pista, nuk kanë ku të garojnë sportistët, sepse u vodhën paratë”, u shpreh deputeti. /vipsport/
