Në mbledhjen e sotme të Asamblesë së KF Vllaznia sh.a është diskutuar për një moment edhe mungesa e drejtorit sportiv të klubit. Njëri nga këshilltarët, ka kërkuar nga drejtuesit të dijë a është zëvendësuar apo jo drejtori i mëparshëm Eugent Zeka i cili, nga ajo që është bërë publike në media, ka dhënë dorëheqjen nga ky post.
Por në fakt, në sqarimin e tij, administratori i klubit Astrit Gjyrezi, ka zbardhur të vërtetën e letrës së Zekës duke e bërë madje publike atë në mes të mbledhjes.
“Drejtori sportiv Eugent Zeka është ende në punë dhe ai nuk ka dhënë dorëheqjen por ka kërkuar spostim nga kjo detyrë në një funksion tjetër”- është shprehur ai.
Një deklaratë e cila në fakt ka sjellë edhe reagimin e këshilltarëve apo dhe të kryetarit të këtij Këshilli Xhemal Bushati sipas të cilëve, nuk ka spostim nga detyra. Ka dorëheqje ose largim nga puna.
Fjala “spostim” që Zeka ka përdorur në letrën e paraqitur në klub nuk ka arritur dot të interpretohet ashtu si duhet nga askush. Që do të thotë se ai ende është në punë ndonëse shumëkush e mendoi të larguar.
© shkodrasport.com
