Pak ditë më parë kemi bërë publik lajmin se dy futbollistë të Akademisë Vllaznia do të provohen për disa ditë drejt Kroacisë për t’u provuar tek ekipi i mirënjohur i Dinamos së Zagrebit.
Fillimisht nuk u bën të ditur emrat e këtyre futbollistëve por tashmë ata janë zbuluar.
Bëhet fjalë për mbrojtësin 17 vjeçar Egzon Shimaj dhe për mesfushorin 18 vjeçar Serjan Repaj.
Të dy këta futbollistë luajnë me ekipin e të rinjve të Akademisë Vllaznia dhe janë ndër elementët më të spikatur të saj.
Jo më kot, drejtuesit e klubit kanë vendosur që “t’i bllokojnë” ata me kontrata afatgjata.
Repaj në fakt është që prej sezonit të kaluar i lidhur me një kontratë shërbimi por gjatë këtyre ditëve do të firmosë kontratën e punës me klubin Vllaznia ashtu siç kanë bërë edhe disa shokë të tjerë të këtij ekipi.
Ndërkohë Shimaj e ka hedhur ditën e hënë dhe është zyrtarisht nën kontratë me ekipin e tij të zemrës.
Gjithsesi në fund të këtij muaji, të dy këta lojtarë do të kenë mundësi të provohen për një javë tek Dinamo Zagreb dhe nëse pëlqehen nuk përjashtohet mundësia që dy klubet të negociojnë për të ardhmen e tyre.
© shkodrasport.com
