Ditën e djeshme i është rikthyer sërish stërvitjes por trajneri i kombëtares shqiptare Zef Gjoni, natyrisht që kthen kokën pas. Pikërisht tek evenimenti i fundit ku mori pjesë bashkë me katër sportistë dhe pikërisht tek Kampionati Europian i 18 vjeçarëve. Duke folur në lidhje me rezultatet e arritura nga sportistët tanë, trajneri Gjoni për gazetën do të thoshte:
“Mendoj se kemi të bëjmë me një paraqitje të shkëlqyer, më e mira në historinë e boksit shqiptar. Kemi arritur të marrim një medalje të bronztë ndërsa një sportist tjetër është futur në tetëshe. Nuk mendoj se mund të ishte më mirë. Të mos harrojmë se kombëtarja e Turqisë që erdhi me një autobuz plot me sportistë dhe staf, është kthyer në vendin e saj pa asnjë medalje. Ndërsa ne, me vetëm 10-15 ditë stërvitje, arritëm këto suksese dhe ato madje mund të ishin edhe më të mëdha. Rexhildo Zenelit, ia kanë humbur ndeshjen në çerekfinale dhe kjo u pa qartë nga të gjithë. Madje, trajneri i kombëtares italiane e konsideroi boksierin e kombëtares sonë “një makineri” të vërtetë në ring. Por kuptohet që në ndeshjen deçisive, duke patur kundër edhe lobimin e gjyqtarëve pro- rusë, ai nuk mundi të fitojë. Vetëm nëse do ta hidhte nokaut kundërshtarin, mund të fitonte Zeneli, ndryshe jo. Sa i takon Uldedajt, ai ka bërë vërtetë paraqitje bindës, madje edhe në gjysmëfinale, ndonëse i dëmtuar në dorë, ka arritur të boksojë si i barabartë me kundërshtarin dhe në fund ka humbur krejt ngushtësisht. Unë i them bravo këtyre dy sportistëve por edhe dy të tjerëve, Erald Muhjes dhe Krenar Zenelit që pavarësisht se u mundën, arritën të bëjnë ndeshje shumë të bukura”. Trajneri Gjoni e konsideron suksesin më të madh të boksit shqiptar në arenën ndërkombëtare pjesmarrjen në këtë Europian.
Gjergj KOLA
