Pasditen e së enjtes do të nisë në Tiranë kampionati i 23-të kombëtar i boksit që zhvillohet në vendin tonë pas viteve ’90. Ai do të zhvillohet për tre ditë me rradhë në palestrën sportive “Fahrije Hoti” dhe në të do të marrin pjesë ekipet më të mira të vendit me sportistët më të mirë. Natyrisht, favoritja kryesore për fitimin e titullit kampion është kampionia në fuqi, Vllaznia e cila ka kohë që përgatitet për këtë aktivitet. Madje, kryetrajner i saj Zef Gjoni, e bën fakt të kryer marrjen e këtij titulli. “Besoj se tashmë ka ardhur momenti të tregojmë edhe njëherë vlerat tona.
Kemi kohë që përgatitemi për këtë kampionat dhe këtë herë mendoj se përgatitjet janë bërë më mirë se çdo herë tjetër falë mbështetjes së presidentëve tanë Flamur Hoxha dhe Gjergj Livadhi. Kampionati do ketë rivalitet por ne jemi të gatshëm për ta kaluar me sukses. Do marrim pjesë të plotë, me 10 pesha dhe me secilin prej tyre kemi pretendimet tona. E sigurtë është që titulli kampion do vijë në Shkodër dhe ky do jetë një titull i veçantë për mua sepse është i 20-ti. Një arritje e madhe që se ka arritur askush tjetër më parë dhe kjo mi shton edhe më shuëm emocionet”- ka thënë Gjoni. Kampionati zhvillohet në Tiranë teksa ekipi I saj është rivali kryesor I Vllaznisë në luftën për titullin kampion megjithatë kjo nuk përbën problem për shkodranët, madje kryetrajneri Gjoni thotë se e ka kërkuar vetë zhvillimin e kampionatit në kryeqytet. “Ka qenë një ide për ta zhvilluar në Shkodër kampionatin por kërkova që ai të zhvillohej në Tiranë sepse duam ta fitojmë atje këtë titull. Ndoshta mund të ketë ndikim nga gjyqtaria për këtë, por mund të pranojmë edhe humbjen e një apo dy ndeshjeve prej saj por kjo nuk do na e heq titullin”- thotë në fund Zef Gjoni. Kampionati starton pasditen e nesërme dhe Vllaznia udhëton sot drejt Tiranës e kompletuar me të 10 peshat e saj duke kërkuar kësisoj të fitojë një titull jubilar, atë të 20-tin. Nje titull qe duket I sigurte nisur nga perberja e ekipit dhe stervitja e bere.
Gjergj KOLA
