Sipas ish-futbollistit të njohur të Vllaznisë, Hysen Zmijani, skuadra e këtij sezoni futbollistik do të jetë konkurruese, pasi ka kryer një merkato cilësore. Në një prononcim për “Panorama Sport”, ai është shprehur: “Mund të them se është ndërtuar një skuadër cilësore. Lojtarët e afruar kanë vlerat e duhura për të përballuar me sukses një sezon të gjatë. Nisur nga kjo, së bashku me lojtarët aktualë kam besim se është ndërtuar një ekip kompetitiv për sezonin e ri.
Gjithashtu nuk e mendoj, madje as s’e çoj nëpër mend se mund të jetë edhe në këtë sezon Vllaznia e vitit të shkuar që luftoi për të siguruar mbijetesën. Jam optimist se gjithçka do të jetë më ndryshe këtë sezon. Nuk mund të parashikoj se në çfarë vendi mund të renditet në fund të sezonit, por jam i bindur se nuk do të ketë objektiv garën për të mbijetuar”, ka thënë fillimisht Zmijani.
Sipas “Mjeshtrit të Merituar të Sportit”, lojtarët që janë afruar në merkato janë cilësorë, por duhet që të vihen në funksion të ekipit.“Afrimet e bëra janë cilësore, për më tepër bëhet fjalë për futbollistë të njohur. Por, unë nuk jam shumë optimist në lidhje me profesionalizimin që ata kanë. Futbollistët shqiptarë shkëputen nga stërvitja sapo fillojnë pushimet e nisin punën sapo gjejnë skuadrën e re. Kjo është e dëmshme. Ata nuk duhet që të shkëputen më shumë se një javë apo dy nga puna dhe pastaj të jenë të gatshëm. Në këtë pikë nuk di sesa të përgatitur janë këta futbollistë që kanë ardhur në skuadër.
Por, është pozitiv dhe gjë e mirë që në skuadër janë afruar sërish futbollistë shkodranë. Ata kanë kontribuar për ekipe të tjera duke treguar vlerat e tyre më të mira. Tani që u ka ardhur mundësia, një gjë të tillë duhet që ta bëjnë edhe me ekipin e Vllaznisë. Duhet të jenë lider te kjo skuadër si Lika, Hasani apo Vucaj. Vlerat e tyre tani t’i tregojnë te Vllaznia. Këtë sezon janë afruar lojtarët që i duhen skuadrës dhe kjo më bën që të shpresoj për një paraqitje edhe më të mirë”, ka vazhduar prononcimin Zmijani.
Vllaznia në takimin e parë të sezonit do të ketë përballë një skuadër të rikthyer në Superiore, siç është Lushnja. Në të tilla ndeshje, kuqeblutë kanë pasur jo pak vështirësi në të kaluarën. “Ajo që më shqetëson, është se sa do të jetë e gatshme skuadra plotësisht për këtë sfidë. Më shqetëson fakti a janë harmonizuar me njëri-tjetrin futbollistët, në mënyrë që të japin më të mirën në këtë përballje. Duhet që të shfrytëzohet sa më mirë që të jetë e mundshme fakti që do të luhet me një ekip të ardhur nga një kategori më poshtë. Megjithatë, besoj se Vllaznia do ta fillojë me këmbë të mbarë këtë sezon, pasi mundësitë janë”, ka përfunduar Zmijani.
