Pasditen e sotme Vllaznia U-19 ka mësuar emrin e kundërshtarit me të cilin do të ndeshet në turin e parë të “Champions Youth League”. Ai është FC Zimbru Chisinau. Moldavët në fakt janë të panjohur për shkodranët të cilët gjithsesi do të tentojnë të bëjnë një paraqitje sa më të mirë ndaj tyre dhe pse jo, të tentojnë kualifikimin.
Trajneri Luan Zmijani në një prononcim për “Shkodra Sport” në lidhje me shortin është shprehur: “Të them të drejtën pjesmarrja në këtë eveniment shumë të rëndësishëm, është një kënaqësi e madhe për ekipin tonë. Unë si trajner provova edhe në vitin 2014 të shpallem kampion i Shqipërisë me Vllaznia U-19 por atëherë nuk e patëm atë fat të luanim në Champions League. Por tashmë kjo dëshirë po më bëhet realitet dhe për mua personalisht është një kënaqësi e madhe dhe po ashtu edhe për futbollistët sepse do të jetë një eksperiencë shumë pozitive për ta. Sa i takon kundërshtarit, nuk kemi asnjë njohuri në lidhje me të. Nëse në pamje të parë dikush gëzohet për nivelin e Zimbrus, mendoj se edhe moldavët duhet të jenë gëzuar që do të ndeshen me ne sepse mendojnë që do të na kalojnë. E rëndësishme do të jetë ndeshja e parë. Pasi të shohim njëri- tjetrin në fushë, do të kemi mundësi pastaj të rregullojmë diçka në ndeshjen e dytë që do të zhvillohet në Shkodër. Gjithsesi për ne e përsëris, e rëndësishme është që do të marrim pjesë në këtë kompeticion kaq të rëndësishëm dhe premtojmë se do të mundohemi ta përfaqësojmë sa më me dinjitet futbollin shkodran dhe atë shqiptar”. Kuqeblutë aktualisht janë në fazë përgatitore teksa stërvitja po zhvillohet shumë intensive me nga dy seanca në ditë, shoqëruar edhe me ndeshje të ndryshme miqësore.
© shkodrasport.com
