Rifillimi i stërvitjeve në Milanello është planifikuar për nesër pasdite dhe duke punuar me grupin për t’u përgatitur për ndeshjen delikate kundër Juventusit (të dielën në 20:45) mund të jenë edhe Kruniç, Loftus-Çik dhe Kalulu, të cilët vazhdojnë seancat e tyre stërvitore të personalizuara dhe për të cilët ndjesitë janë pozitive.
Ndërsa pret të dijë nëse do t’i ketë në dispozicion, Stefano Pioli nis të studiojë mbrojtjen që do të përballet me bardhezinjtë sepse në “San Siro” do të mungojnë Majk Menja dhe Teo Hernandez për shkak të pezullimit, dy lojtarë shumë të rregullt në një prapavijë e cila që prej derbit duket se është rikthyer po aq solide sa ajo i titullit dhe që në 540 minutat e fundit ka pësuar vetëm një gol në fitoren 3-1 në Kaljari.
RRITJA – Pesë shuplakat e Interit (e vetmja ndeshje pa praninë e Fikajo Tomorit) ishin të rënda, por që atëherë “djalli” ka ngritur murin duke ndryshuar edhe formacionin (kundër Veronës) dhe interpretuesit. Qendërmbrojtësi anglez, i cili së fundmi ka qenë titullar edhe për kombëtaren e tij, është pika kyçe e vërtetë dhe përkrah tij Çaut po përmirësohet shumë (dhe tërheq vëmendjen e skuadrave të mëdha) siç bëri Kalulu në vitin e titullit kampion. Dyshja qendrore nuk është për diskutim, ndaj Juventusit do të jetë sërish radha e tyre, ndërsa për të zëvendësuar Teo (vetëm një fitore, 3 barazime dhe 3 humbje kur ka munguar) trajneri do të fokusohet tek një mes të riut francez (nëse do të jetë rikuperuar) dhe Florencit, i cili po gjen më në fund vazhdimësinë dhe minuta pas problemeve fizike të sezonit të kaluar.
PËR ECURINË – Në portë do të jetë sërish radha e Sportielos, duke bërë paraqitjen e tij të katërt këtë sezon, tre prej të cilave si titullar. Ish-portieri i Atalantas ka treguar se mund të zëvendësojë Menjanë me paraqitjen e mirë në Kaljari dhe pritjet e shkëlqyera kundër Veronës e Njukasëllit ndaj do të ketë për detyrë të zgjasë ecurinë e pamposhtur të kuqezinjve ndaj Juves. Në fakt, “zonja e vjetër” nuk ka shënuar kundër Milanit prej më shumë se dy vjet, që nga goli i Moratës në shtator 2021.
