Lushnja gjen trajnerin e ri. Drejtimi i stolit të skuadrës i është besuar Hysen Dedjes. Ndonëse dy ditë më parë u duk se akordi u prish, gjërat morën rrjedhë tjetër dhe pas insistimit të drejtuesve të klubit edhe Dedja ka ndryshuar mendje dhe i ka thënë “po” ofertës së tyre. Shkodrani ka arritur akordin me kryebashkiakun Fatos Tushe për të zëvendësuar në stol të larguarin Artan Bano.
57-vjeçari është zyrtarisht tekniku i ri i skuadrës, ndërsa prezantimi i tij do të bëhet paraditen e së martës, në praninë e drejtuesve të klubit. Hysen Dedja është një prej emrave të njohur të futbollit shqiptar, por që rikthehet në detyrë pas një mungese të gjatë në stol. Skuadra e fundit që ka drejtuar ka qenë Bylisi në sezonin 2008-2009.Për trajnerin bëhet fjalë gjithashtu për rikthimin e tretë në krye të Lushnjës, skuadër të cilën e ka drejtuar në sezonin 1999-2000 dhe për herë të fundit në vitin 2001 në elitën e futbollit në vend.Në karrierën e tij, Dedja ka drejtuar gjithashtu tre herë edhe Vllazninë, ndërsa ka punuar edhe në stolin e Teutës, Luftëtarit, Laçit, Erzenit dhe Egnatias. Shkodrani do të debutojë në Gjirokastër, në duelin ku Lushnja do të përballet me Luftëtarin, ndeshje që mbyll edhe fazën e parë të Kategorisë Superiore.
© shkodrasport.com
