Një bashkëpunim i ri dhe shumë i rëndësishëm për të ardhmen ka nisur nga sot për futbollin e femrave në Shkodër dhe Shqipëri. Dy klube futbolli, ai “Juban Danja” dhe “KF Murlani” kanë rënë dakord dhe kanë arritur një marrëveshje për bashkëpunim në mes tyre me ekipin e femrave.
Marrëveshja është firmosur në mes dy presidentëve, Ferdinand Jaku të “Juban Danjes” dhe Përparim Rraboshtës së “KF Murlani”. Sipas tyre, qëllimi i kësaj marrëveshje është rritja e nivelit dhe cilësisë së këtij ekipi.
Kuptohet që z. Jaku pas 15 vitesh investimi tek ekipi i parë i krijuar në Shqipëri, nuk ka mundur ta mbajë atë dot lart për të qenë në mes pretendentëve dhe si rrjedhojë, ka gjetur një mundësi bashkëpunimi me klubin e formuar kohët e fundit por që ka hyrë fuqishëm në treg, fillimisht më futbollin e moshave, por tashmë po shtrihet edhe me ekipin e të rriturve dhe së fundi edhe me femrat.
Nga sa mësohet, që prej ndeshjes së ardhshme, ekipi do të përfaqësohet në kampionat me emrin “Juban Danja- KF Murlani” Aprovimi për këtë gjë është marrë edhe nga Federata Shqiptare e Futbollit dhe synimet e dy drejtuesve janë që shumë shpejt, ky ekip të shndërrohet sërish ndër pretendentët e kampionatit.
Për këtë arsye, me hapjen e merkatos, pritet që “Juban Danja- KF Murlani” të forcohet me lojtare të tjera cilësore dhe në këtë mënyrë ky bashkëpunim pritet të japë shumë shpejt frutet e veta./SHKODRA-SPORT.COM/
