Ishte e konfirmuar dhe tashmë është zyrtare, Orges Shehi nuk do të vazhdojë të jetë në krye të stolit të Kukësit. Durrsaku nuk arriti asnjë nga objektivat e vendosura nga drejtuesit (Kupën dhe kampionatin) dhe pas një bisede me presidentin Gjici është vendosur ndërprerja e bashjëpunimit mes palëve.

Këtë lajm e ka konfirmuar vetë klubi verilindor nëpërmjet një deklarate për shtyp të publikuar vetëm pak çaste më parë, ku vihet në dukje besimi, që Gjici i dha Shehit për të drejtuar një skuadër si ajo e Kukësit të sivjetshëm.

KOMUNIKATA E KLUBIT TË KUKËSIT:

Klubi i Kukësit njofton se Orges Shehi nuk është më trajner i skuadrës sonë. Pas përfundimit të sezonit, presidenti dhe trajneri kanë rënë dakord për të mos vazhduar më aventurën së bashku.

Megjithëse një trajner i ri në eksperiencë, presidenti i besoi trajnerit Shehi një nga ekipet më të mira që Kukësi ka pasur.

Klubi i Kukësit e falënderon trajnerin Shehi për kontributin e dhënë në këtë periudhë të vështirë për futbollin shqiptar dhe jo vetëm dhe i uron suksese në të ardhmen. /vipsport.al/