Lëvizje surprizë në merkato! Ish-sulmuesi i Partizanit, Xhuliano Skuka do të vijojë karrierën te Maribori në Slloveni.
Bomberi dibran është huazuar nga skuadra e Metz, te ekipi që numëron plot 25 trofe në elitën e futbollit slloven, 16 kampionate dhe 9 kupa.
Lajmi është konfirmuar nga vetë Maribori, nëpërmjet një postimi në faqen zyrtare në “Instagram”. Skuka është shfaqur duke pozuar me fanellën e skuadrës së re. Kujtojmë që në këtë sezon që sapo u mbyll, Maribori u rendit në vendin e tretë në renditje.
Për sa i përket aventurës me Metz në Francë, sulmuesi 24-vjeçar u aktivizua vetëm 9 ndeshje, pa mundur të përshtatej siç duhej në aventurën e tij të re në Ligën e dytë franceze.
