Ndryshimet e paralajmëruar tek ekipet e basketbollit të Vllaznisë tashmë janë zyrtarizuar.
Paraditen e sotme, Refik Vorfa ka marrë emërimin si trajner i ekipit të meshkujve.
Menjëherë pas këtij zyrtarizimi, në një intervistë për “Shkodra Sport” ka shpjeguar edhe arsyet që e çuan t’i thotë “po” një oferte të tillë.
“Gjendja jo e mirë që ka kaluar ekipi i basketbollit në sezonin e fundit dhe kërkesa e sportistëve por edhe e dashamirësve të këtij sporti, më ngacmuan idenë e rikthimit si trajner pranë saj.
Unë kam qenë afër tyre, e njoh situatën dhe do shpresoj të bëj më të mirën, në rradhë të parë për të rikthyer besimin tek to”- është shprehur ai.
Ndërkohë, i pyetur se çfarë do të ndryshojë dhe cilat do të jenë pretendimet e ekipit të Vllaznisë në sezonin e ri, Vorfa shprehet.
“Objektivi është të marrim vendin që na takon dhe jo një vend që nuk meritojmë.
Se ku do të renditemi pastaj, këtë do ta tregojë ecuria gjatë kampionatit sepse varet edhe nga niveli i kundërshtarit, blerjet që ato do bëjnë dhe shumë gjëra të tjera.
E rëndësishme është që ne të bëjmë punën tonë dhe të rikthejmë besimin tek sportistët”- ka thënë ai.
Vorfa do të marrë vendin e Bledar Gjeçajt tek meshkujt ndërkohë që ky i fundit është zyrtarizuar tashmë si trajner i ekipit të basketbollit të femrave të Vllaznisë.
www.shkodrasport.com
