Marko Cetkovic është zyrtarisht lojtari më i ri i Sutjeska, kampion në Mal të Zi. Përpjekjet e klubeve shqiptare, Tirana e Kastrioti, kanë shkuar dëm, pasi fantazisti ka vendosur të qëndrojë në kampionatin malazez.
Lajmi është bërë zyrtar nga klubi i Sutjeska, që ka njoftuar përmes faqes zyrtare, ndërkohë që edhe vetë mesfushori në rrjetin social “Facebook” e ka raportuar diçka tillë, teksa shkruan: “Për të tjera suksese. Faleminderit ish-klubit tim, FK Mladost”.
Me tetë golat e shënuar sezonin e shkuar, si dhe me paraqitjet e asistet e dhëna, Cetkovic u përzgjodh në formacionin më të mirë në Mal të Zi për sezonin e shkuar.
Për të interesoheshin disa klube. Rabotnicki e donte në ekip, por e humbi garën me kampionët e Sutjeska. Nga Shqipëria ishte Kastrioti që u mundua të bënte diçka, ashtu sikurse edhe Tirana.
Për këta të fundit u tha se ishte shumë pranë akordit, por ashtu si vjet, Cetkovic ka zgjedhur të qëndrojë pranë familjes, ndërkohë që ka përzgjedhur edhe një klub që do të ketë pretendime.
Cetkovic në të shkuarën ka luajtur në Superiore me Laçin dhe Partizanin. Me këta të fundit bashkëpunoi vetëm gjashtë muaj, kurse me bardhezinjtë u aktivizua në dy sezone, duke bërë gjëra të mira, sidomos në kampionatin e parë, kur së bashku me James Adeniyi formonin një dyshe mjaft të rrezikshme.
Mesfushorin me fanellën e Laçit arriti të fitojë edhe Kupën e Shqipërisë, madje duke qenë protagonist me asistin e dhënë në golin e fitores në finalen kundër Kukësit, në të cilën kurbinasit triumfuan me rezultatin 2-1. /EDS/
